اللى يفرق فى العلاقة
ناس كتير في حياتنا عدوا
مكتوبين سطرين في صفحة
يعني عدوا ماطولوش
اتخدعنا في الوشوش
بس ربك جه فضحهم
مشيوا دغري ماكملوش
يالله عادى الله يسامحم
المهم هتخدى بالك
وإعملي دايما حسابك
انه لو مقسوم لك انتي
كان فضل وماكنش سابك
والحقيقة دا شئ يفرح
ليه بقي شايفاها كارثه
الغرام مش ناس ومطرح
الغرام مش بالممارسه
حبي نفسك قبل غيرك
وافهمي انك كيان
مش عشان فشلتي مره
تقفلي كل البيبان
مش علشان مره إتخدعنا
نبقي نستسلم وضيعنا
غلطة القلب انه طاعنا
فتجرح قبل الاوان
شوفي شكلك في المرايا
وأحكمى انتي بضمير
هي دي تبقي الحكاية
انه كان انسان ضرير
كنتي نعمه وهو جاحد
ضيعك من بين ايديه
كان مزيف دمه بارد
وانتى كنتِ خساره فيه
بطلى جنانك يا هبله
كلهم عنتر لـ عبله
دى القلوب لو تبقى عقلة
اللى باع ينداس عليه
عادل عوف
 |
| اللى يفرق فى العلاقة / الشاعر: عادل_عوف - دمياط - Literary prose poem |