بسم الإله.. المحبة....والهوي ...والشوق
بإسم اللي خلق القلب ياخدك ويطلع فوق
بإسم اللي رفّ القول ..عُملة علي بَختنا ..
إما كتابة و هوي .. أو صورة فيها شقوق
بإسم اللي ذاق واتفتن ..وافتتن واتنسي
بإسم اللي بخّر روحه ..م الغيرة والوسوسة
بسم اللي آمن حكي.. فاتحكي ..واتجرح
ربك ..سبل سترنا .. علي كربنا ..والفرح
فـ ما تكشفوش قلبكم لـ للي ما ذاقش الوجع
وما تسرجوش شمعكم .. علي سيرة اللي اتخدع
اللي يدوب م الهوي.. ويهيم ماهوش (معتوه)
نفسه يعيش في نعيم .. ما وصلش ناس ضلّوه
يا قهرُه م اللي رموه ..بالجنوووون والطيش
مصاحب خياله ومشاعره ..مجذوب كما الدراويش
باني لحبيبه مقام .. وهو الوحيد ..بـ يزور
يحرق مشاعره الخام .. زي الفراش ف النور
عشق القليب ابتلاء .. زي الفراق والموت
لا بايدنا يوم نختار ...ولا فيه قرار مظبوط
يا معتوهين زيّنا.. صلّوا علي اللي انكوي
وادعوا الكريم يسنده.. لكل امرئ ما نوي
وما تجرحوش بالعمد ..دي الجرح ينزف روح
يا حضرة المُهتم .. باب العشم ..مفتوح
فـ لو عرفتوا اكتموا.. ايه الداعي قلنا وقال
لكل قاعدة شواذ.. وبتختلف الاحوال
في ناس بتعشق جسد .وناس بتعشق روح
والأمر لـ اللي غَلَب.. مش هاشرح المشروح
يعني نهاية القول .. العشق. زي الغول..
ودا مش كلام وخلاص..فـ ما تسمعوش لـ عزول.