الزعيم الخالد
هلك لي لجراح من جاني سوال *
يسفسرني عالوطن وش احوالو .
ونّسني بجواب يبري من لعلال *
ڤال سنيني على اهلي راهم طالو .
سافر هج وغاب بعدن غاب هلال *
من بعدو شهد النحل ما يحلالو .
ريح تهلّك عالوطن شڤّڨ لجبال *
حيطانو من ساسهم عنّا مالو .
يا غبني خبر البلا حرك زلزال *
وتهوّل موج القدر جاب اهوالو .
بوخروبه فالورق واسم النضال *
بومدين معروف من زين اخصالو .
مات بليلةْ لربعاء سيد الرجال *
أمر المولى فالقضا لا من سالو .
اسمو يكفي تذكرو يجمد ما سال *
تـتـبكـّم لعباد تسمع لقوالو .
سبع الهدَّه ساحتو ترجف لبطال *
يرهب بالنظره قبل لا تصغالو .
البسْمَه منها يفسّر لك مقال *
ويكشّر من ڤابلو ذاب ڤبالو .
نُصرَه للمظلوم سِيد الرايس ڤال*
قرّرنا بلسان يڤدي مشعالو .
يبكيه الفلاح حط من الترحال *
يبكيه الشباب شركو بافعالو .
تبكي نسوتنا جيال عڤاب جيال *
عڤرو ما جابو شبيه ويصفالو .
يبكوه الثوار يبكوه العمال *
يبكو عنو احرار ذا الكون بحالو .
تبكي فلسطين بعدو لاحتلال *
في القدس الشريف دنس بارذالو .
تبكي غزة وقفتو عنها وشحال *
ذالصهيوني صب حڤدو واغلالو .
يبكي جبل اوراس يبكي جبل كسال*
يبكي ونشريس يبكوه ابطالو .
يبكي كرداده وجبل عمور يسال*
يبكيه الجنوب تبكيه ارمالو .
وشم اسمو منقوش وحروفو محال *
تتبدل ، ويمجدوه اذا ڤالـــو .
ديما حاضر فالڤلوب اذا من سال *
قلـّو فالدنيا الرجال امثالو .
بصمه فالتاريخ مهما طال الحال *
سجلها من راح للي مـــازالو
الشاعر : أحمد الشريف أخضري
الشاعر : أحمد الشريف أخضري