👈 كلّنا مهزومين وبنقاوح👉
🏵️من سن ال60 وطالع
مهزوم بفعل الزمن وتغيّر الاحوال
اجابة حياته انتهت.. وفاضل له لسه سؤال
مين االي غمّي القمر .. ؟
خلّا السما مغيّمة
ومين قطف م الشجر.. العمر.. وفرطنا؟
خط السنين ع الوش.. نقّطنا
لمّينا اغراضنا فوق ظهرنا وماشيين
اكتر هزيمة تشوفها في عيونهم
انا بكرة رايح.. بس بكرة منين ؟
🌻من 40 ل60
مهزوم في عاركة حياته.. بفعل الظروف والبخت
نسج الشقا غنوتة في قلب حنجرته
.. طلع الغنا تنويح
ما عملش شئ في حياته غير انه يتأسف
رغم انه مش غلطان..
بس اشتعال الأبيض في اطراف كلامه ونظرته
فوران..
عامل حساب الجاي رغم الجاي مش مضمون
كل اللي فات قضّاه من المدة..
علي ذمة التحقيق
بـ عين يشوف الدنيا فاعل خير..
وبـ عين يشوفها في وقت شدة صديق
لكنّه بيغمّض ويشوف باحساسه
الدنيا كما حلقة عمر مفقودة ..
جدة بتحكي العمر حدوتة
لعيال بتكبر كل يوم عُمرين
🌺من عمر 20 ل40
مهزومين في عيوننا احنا..
زي اللي داخل حرب من غير سلاح
بورقة وقلم بنجمّع الاحلام..
ونمّد خطوة حبّنا.. لبكرة
فينا انطلاق المعني من غير قصد
فينا مساحة لغم.. لو حد مس القلب
فينا الكناية المضحكة المبكية
اول رصيف للعمر .. اول مواصلة لحلم بيقرّب
احساس جديد في كل شئ نعرفه
احساس غريب او يعني مش مفهوم
ملّخصين العمر حبًة صور..
نشتاق لنا فبنفتح الألبوم
واليوم يجٌر اليوم يجٌر سنين
وما بين طرفة عين وانتباهتها..
بتعجّز الضحكة واحنا.. مش عارفين..
بنكرمش النظرة في وش الناس..
فنشوف لأبعد حتّه جوّاهم
ونشوف قلوبهم فوق لسان الحال
ونعلّم الحكايات تسمع ماتتقالشي
لو وافقة فينا الدنيا علي رأسها..
بـ نزق فينا عَجلَها... وبنمشي..
.....................................................
عفاف التركي