بناءًا علي الأزمات
وروح مطفية من مدة
وجسم وداب من الشقيان
أنا آسف
وبناءا على التقصير
وسوء الحال وعصبيتي
خروج البسمة من بيتي
أنا آسف
أنا آسف لكل عزيز على قلبي
وخارج برة حساباتي
آنا آسف
وعارف إني من مدة
مانيش موجود كما الأول
وحاسس إني مش قادر
وإن غيابي ده مطول
فأنا آسف
زرعت ورود كتير ياما
وحبتها
طلعت بناس لفوق ياما
وعلتها
حاولت أكمل المشوار
لكني فشلت
زرعت الصحرا نور وعمار
وفجأة أنا بورت
فأنا آسف
مافيش طاقة في جسماني
لشئ تاني
يدوب الطاقة بتكفي
أعدي بقايا أيامي
ومش راضي علي نفسي
ولا حالي
بقاوم كسرتي ويأسي
بطول بالي
فخانِّي الصبر
تركت صميم هواياتي
مافيش ثانية لغير السعي
بقيت مسحول ومستهلك
وناقص وعي
بقابل ناس فبتلخبط في أسمائهم
وأشكالهم
وكنت زمان أنا العادل لميل حالهم
فمين يعدلي مين حالي
ومين يعدل ميول مالي
وأيه الحل للأزمة
سكوت العجز متلازمة
وسكنتني
فأنا أسف
أنا آسف لكل حبيب
خزلته وديرتله ضهري
آنا آسف علي التقصير
وحزني وكسرتي وقهري
أنا آسف علي الفرحة اللي مش كاملة
علي الحزن اللي أي كلام
تواجد من باب الواجب
ماهوش سندة
وأنا عارف بإن الحالة مش هيَّ
وإن الشخص غير الشخص
وإني بقيت واحد تاني
بقصده وغصب بيعاني
وإن أنا حالة متعادة ما بين ملايين
وخدنا الوضع إجباري لناس تانيين
ونفسك نفسك أنت وبس
ومش فاضي تشوف وتحس
ولو حسيت لا هتقدم ولا اتأخر
ولو قدمت مرة في يوم
أكيد قدمت متأخر
فوضعك زي وضعي تمام
بتشقى وتشقى ثم تنام
وتصحى وتشقى من تاني
يا روح مخنوقة بتعاني
آنا آسف على حالتك
أنا آسف على حالتي
أنا آسف ومش عارف
أقولك أيه ومستهلك وتعبان
هسيبك أصلي مش قادر
وهستأذن ورايح أنام